Павлодарда мемлекеттік тілге арналған «Парасатты кәсіпкер» конкурсы өтті

2017 жылғы 22 қарашада  Достық үйінде қазақ тілі білгірлерінің «Парасатты кәсіпкер» конкурсы өткізілді. Облыс тілдерді дамыту жөніндегі басқармасы  «Рухани жаңғыру» бағдарламасы шеңберінде және мемлекеттік тіл саясатын іске асыру мақсатында кәсіпкерлер арасында мемлекеттік тілге арналған конкурс ұйымдастырды.

Конкурсқа Павлодар, Ақсу және Екібастұз қалаларының түрлі деңгейдегі тұрғындарға қызмет көрсету саласындағы кәсіпкерлерден  құралған 5 команда қатысты. Сайыс үш кезеңде өтті. Бірінші кезеңде командалар өздерін таныстырып, үй тапсырмасын орындаса, екінші кезеңде түрлі қызмет көрсету салаларында кездесетін ситуациялық тапсырмаларды орындады. Қорытынды кезеңде термин сөздерді аударып, оқиға желісі бойынша мәтін құрастырды.

Барлық қатысушылар мемлекеттік тілдегі білімдерін ортаға салып, жаңа термин сөздерді сауатты пайдаланып, ситуациялық тапсырмаларды шеберлікпен шешті. Барлық командалар өздерінің ерекшеліктерімен және белсенділіктерімен танылды.

Конкурс қорытындысы бойынша әділқазылар алқасының шешімімен І орынға «Ұлттық мұра» командасы (Павлодар қаласы), екінші орынға «Белсенді көмір» командасы (Екібастұз қаласы) және үшінші орынға «Самға» командасы (Ақсу қаласы) лайықты деп танылды.

Конкурс қатысушыларын құттықтаған облыс тілдерді дамыту жөніндегі басқармасының басшысы С. Османова: «Мұндай іс-шаралар келешекте дәстүрге айналатынын, бұл конкурс алғаш рет өткізіліп жатқанын алға тартып, барлық қатысушылар мемлекеттік тілдегі білімдерін ғана емес, сонымен қатар облыс тұрғындарына қызмет көрсетуге қажетті өздерінің жан-жақты, шапшаң қасиеттерін де көрсете білді» – деп атап өтті.

«Қазақ тілін жаңа форматта оқыту әдістемесі» тақырыбындағы онлайн семинар

«Рухани жаңғыру» бағдарламасы және Тілдерді дамыту мен қолданудың 2017-2019 жылдарға арналған облыстық іс-шаралар жоспары аясында облыс тілдерді дамыту жөніндегі басқармасының ұйымдастыруымен 2017 жылғы 17 қарашада С. Торайғыров атындағы Павлодар облыстық әмбебап ғылыми кітапханасында қазақ тілін оқытатын педагогтардың біліктілігін арттыруға бағытталған «Қазақ тілін жаңа форматта оқыту әдістемесі» тақырыбындағы облыстық онлайн семинар өткізілді.

Семинардың мақсаты – онлайн режимі арқылы қашықтан қол жеткізу мүмкіндігін пайдалана отырып қазақ тілі оқытушыларының біліктілігін арттыру.

Аталған шарада ЖОО ғалымдары, тіл мамандары, Павлодар, Екібастұз қалалары және Май, Лебяжі аудандарының қазақ тілі оқытушыларына дәріс оқыды. Қазақ тілі оқытушылары мемлекеттік тілді оқыту кезінде қолданылатын әдістемелер мен жаңа технологиялармен танысып, онлайн режимінде сабақ үлгілерімен таныстырылды.

«Павлодар облысындағы ономастиканың өзекті мәселелері» атты семинар

Павлодар қаласында 2017 жылдың 8 қарашасында облыс тілдерді дамыту жөніндегі басқармасының ұйымдастыруымен «Павлодар облысындағы ономастиканың өзекті мәселелері» атты семинар болып өтті.

Аталған шараға облыстық ономастика комиссиясының мүшелері, қала, аудандардың мәдениет және тілдерді дамыту бөлімдерінің басшылары, тіл мамандары, қала, аудан әкімі аппараттарының мемлекеттік-құқықтық бөлімдерінің жауапты мамандары шақырылды. Семинарда мемлекеттік заңды тұлғаларға, мемлекет қатысатын заңды тұлғаларға және елді мекендердің құрамдас бөліктеріне жеке адамдардың есімін беру қағидалары туралы сөз қозғалып, қайта атау кезіндегі ұсталынатын нақты критерийлер туралы мәселелер алға тартылды.

Сондай-ақ бұл мәжілісте қала, аудандардың ономастика бағытындағы атқарылған жұмыстары қорытындыланып, келесі жылға белгіленген жоспарлары тыңдалды. Маңызды мәселелер талқыланған жиын ономастика бағытындағы түйіндердің шешілу жолдарын анықтап, ономаст мамандардың бір мәмілеге келуіне өз септігін тигізді.

Латын графикасындағы қазақ әліпбиін қолдау бойынша семинар-кездесу

2017 жылғы 27 қазанда «Рухани жаңғыру» бағдарламасы және Тілдерді дамыту мен қолданудың 2017-2019 жылдарға арналған облыстық іс-шаралар жоспары шеңберінде Павлодар облысының тілдерді дамыту жөніндегі басқармасы облыстағы тіл мамандарының қатысуымен «Латын жазуы және аударма ерекшеліктері» атты семинар өткізді.

Кездесу барысында Елбасы бекіткен латын графикасындағы қазақ әліпбиі туралы сөз қозғалып,  қазақ жазуын латын графикасына кезең-кезеңімен көшіру мәселелері талқыланды.

Семинардың тәжірибелік бөліміне Павлодар мемлекеттік педагогикалық институтының профессоры, ф.ғ.к. Р.Б. Шақаман және С. Торайғыров атындағы Павлодар мемлекеттік университетінің доценті,  ф.ғ.к. А.О. Кәріпжанова қатысып, ресми іскери құжаттарды дайындауда жаңа графиканы дұрыс қолдану ережелері айтылды.

«Тіл білімі және латын әліпбиі» тақырыбындағы онлайн семинар

«Рухани жаңғыру» бағдарламасы және Тілдерді дамыту мен қолданудың 2017-2019 жылдарға арналған облыстық іс-шаралар жоспары аясындаоблыс тілдерді дамыту жөніндегі басқармасының ұйымдастыруымен 2017 жылғы 18 қазанда С. Торайғыров атындағы Павлодар облыстық әмбебап ғылыми кітапханасында қазақ тілін оқытатын педагогтардың біліктілігін арттыруға бағытталған «Тіл білімі және латын әліпбиі» тақырыбындағы облыстық онлайн семинар өткізілді.

Семинардың мақсаты – онлайн режимі арқылы қашықтан қол жеткізу мүмкіндігін пайдалана отырып қазақ тілі оқытушыларының біліктілігін арттыру.

Аталған шарада жоғары оқу орындарының ғалымдары Ақсу қаласы және Ертіс, Павлодар аудандарының қазақ тілі оқытушыларына дәріс оқыды. Қазақ тілі оқытушылары мемлекеттік тілді оқыту кезінде қолданылатын әдістемелер мен жаңа технологиялармен танысып, сондай-ақ онлайн режимінде қазақ тілі әліпбиінің латын графикасына кезең-кезеңімен көшу мәселесі талқыланды.

«Латын әліпбиіне көшу – заман талабы»

Облыс тілдерді дамыту жөніндегі басқармасының ұйымдастыруымен 2017 жылғы 16 қазанда жоғары оқу орындарының студент жастарымен «Латын әліпбиіне көшу –  заман талабы» атты пікірсайыс өткізілді.

Латын негіздегі қазақ жазуы – бұл қазіргі заманғы технологиялық ортаның,  ком­муникацияның,  сондай-ақ, жаһандану дәуіріндегі ғылы­м, білім тілі. Яғни,  латын әліпбиіне көшу  – заман талабы екенін терең түсіну, ол туралы жастардың пікірімен бөлісу және өз ойларын ортаға салу шараның басты мақсаты болды.

Шараға жастар бастамаларын дамыту орталығының өкілі, С. Торайғыров атындағы Павлодар мемлекеттік университетінің, Павлодар мемлекеттік педагогикалық институтының, Инновациялық Еуразия университетінің  және  Б. Ахметов  атындағы  Павлодар  педагогикалық колледжінің белсенді студенттері қатысып, өз ойларымен бөлісіп, пікір алмасты. Елбасының шешімін қолдап, оның ары қарай жүзеге асуына өз үлестерін қосатындарын да жеткізді.

Шара барысында ұйымдастырушылар жастардың бастамалары мен идеяларына әр уақытта қолдау көрсетуге дайын екендерін атап өтті.

                                  

«Қазақстанның болашағы – қазақ тілінде»

Қазақстан Республикасы Мәдениет және спорт министрлігінің тапсырысымен Тілдерді дамыту және қоғамдық-саяси жұмыс комитеті Қазақстан Республикасында тілдерді дамыту мен қолданудың 2011-2020 жылдарға арналған мемлекеттік бағдарламасына сәйкес Павлодар облысында ағымдағы жылдың 9-13 қазан аралығында «Қазақстанның болашағы – қазақ тілінде» орыстілді азаматтарға мемлекеттік тілді насихаттауға, ономастика және қазақ тілінің әліпбиінің латын графикасына көшу мәселелеріне арналған  шарасын өткізуде. Аталған жұмыс тобы Павлодар, Екібастұз, Ақсу қалаларында және Железин, Качир, Шарбақты, Ертіс, Павлодар, Успен аудандарында ұйымдастырылды.

Шараның мақсаты – орыстілді азаматтар арасында қазақ тілінің мемлекеттік тіл ретіндегі мәртебесі, Қазақстандағы этностардың бірлігі мен ынтымағының кепілі ретіндегі, қоғамдық көпшілік орындардағы, жас ұрпақ тәрбиесіндегі, патриоттық, ғылым-білім, жаңа технология саласындағы қызметтері, қазақ тілін латын қарпіне көшірудің маңыздылығы, идеологиялық тұрғыдан ескірген елді мекендер мен көшелердің атауы, олардың тарихи атауларын қайтару, сонымен қатар тарихи жер-су атауларын, ұлттық танымға жақын дәстүрлі атауларды беру және т.б. турасында сөз қозғау, пікір алмасу.

Қалалар мен аудандарда қазақ тілінің мемлекеттік тіл ретіндегі мәртебесін арттыру, ономастика және қазақ әліпбиінің латын графикасына көшуі жөнінде мәселелер көтеріліп, талқыланды.

Жұмыс тобының құрамында белгілі саясаткерлер, қоғам қайраткерлері, ғалымдар және жергілікті атқарушы органдардың өкілдері бар. Шараға Қазақстан Халқы Ассамблеясы ғылыми-сараптама кеңесінің мүшесі, саясаткер, Қазақстанға еңбегі сіңген қайраткер Дос Көшім, Павлодар облысы тілдерді дамыту басқармасының басшысы Османова Сәуле Ғабдулжапарқызы, Қазақстан жазушылар одағының Павлодар облыстық филиалының директоры, тіл жанашыры Арман Қани қатысты.

Барлығы жобаға 500-ге жуық адам қамтылды. Олардың құрамына зиялы қауым, этномәдени бірлестіктер мүшелері, орыстілді азаматтар, жұмысшы жастар, жоғары оқу орындарының, колледждердің студенттері және т.б. бар.

Сонымен қатар ағымдағы жылғы 13 қазанда Павлодар облысының өңірлік коммуникациялар қызметінде аймақта жүргізілген іс-шаралардың қорытындысы бойынша брифинг өтті. Брифинг барысында қазақ тілі әліпбиінің латын графикасына кезең-кезеңімен көшу, елді мекендер мен құрылымдық бірліктерін қайта атау және мемлекеттік тілді қызмет көрсету саласында қолдану мәселелері айтылды.

«Латын графикасына көшудің ұтымды тұстары» атты дөңгелек үстел өтті

Павлодар облысы тілдерді дамыту жөніндегі басқармасының ұйымдастыруымен 2017 жылғы 10 қазанда Достық үйінің конференц-залында латын әліпбиі мәселелері бойынша «Латын графикасына көшудің ұтымды тұстары» атты дөңгелек үстел өтті. Аталған жиынға зиялы қауым өкілдері, жоғары оқу орындарының ғалымдары, тіл жанашырлары қатысты.

Дөңгелек үстелдің негізгі мақсаты латын тілінің қазіргі зама-науи технологиялық ортаның, коммуникацияның, XXI ғасырдағы ғылым, білім және ұлтаралық қатынас тілі екенін, жаңа мамандардың ашықтық, прагматизм мен бәсекеге қабілеттілігін арттырудағы басты факторларын айқындау.

Елбасы Н.Ә. Назарбаевтың «Болашаққа бағдар: рухани жаңғыру» бағдарламасынан бастау алып отырған қазақ әліпбиінің латын графикасына көшудің ұтымды тұстары жан-жақты талқыланды.

«Қазақстанның болашағы – қазақ тілінде»

Қазақстан Республикасы Мәдениет және спорт министрлігінің тапсырысымен Тілдерді дамыту және қоғамдық-саяси жұмыс комитеті Қазақстан Республикасында тілдерді дамыту мен қолданудың 2011-2020 жылдарға арналған мемлекеттік бағдарламасына сәйкес Павлодар облысында ағымдағы жылдың 9-13 қазан аралығында «Қазақстанның болашағы – қазақ тілінде» орыстілді азаматтарға мемлекеттік тілді насихаттауға, ономастика және қазақ тілінің әліпбиінің латын графикасына көшу мәселелеріне арналған  шарасын өткізуде. Бүгінгі күні аталған жұмыс тобы Железин, Качир, Шарбақты және Успен аудандарында болып, алдағы уақытта Павлодар, Екібастұз, Ақсу қалаларында және Ертіс, Павлодар аудандарында ұйымдастырылады.

Шараның мақсаты – орыстілді азаматтар арасында қазақ тілінің мемлекеттік тіл ретіндегі мәртебесі, Қазақстандағы этностардың бірлігі мен ынтымағының кепілі ретіндегі, қоғамдық көпшілік орындардағы, жас ұрпақ тәрбиесіндегі, патриоттық, ғылым-білім, жаңа технология саласындағы қызметтері, қазақ тілін латын қарпіне көшірудің маңыздылығы, идеологиялық тұрғыдан ескірген елді мекендер мен көшелердің атауы, олардың тарихи атауларын қайтару, сонымен қатар тарихи жер-су атауларын, ұлттық танымға жақын дәстүрлі атауларды беру және т.б. турасында сөз қозғау, пікір алмасу.

Аудандарда қазақ тілінің мемлекеттік тіл ретіндегі мәртебесін арттыру, ономастика және қазақ әліпбиінің латын графикасына көшуі жөнінде мәселелер көтеріліп, талқыланды.

Жұмыс тобының құрамында белгілі саясаткерлер, қоғам қайраткерлері, ғалымдар және жергілікті атқарушы органдардың өкілдері бар. Шараға Қазақстан Халқы Ассамблеясы ғылыми-сараптама кеңесінің мүшесі, саясаткер, Қазақстанға еңбегі сіңген қайраткер Дос Көшім, саясаттанушы Айдос Сарым, Павлодар облысы тілдерді дамыту басқармасының басшысы Османова Сәуле Ғабдулжапарқызы, Қазақстан жазушылар одағының Павлодар облыстық филиалының директоры, тіл жанашыры Арман Қани қатысуда.

Барлығы жобаға 500-ге жуық адам қамту жоспарлануда. Олардың құрамына зиялы қауым, этномәдени бірлестіктер мүшелері, орыстілді азаматтар, жұмысшы жастар, жоғары оқу орындарының, колледждердің студенттері және т.б. бар.

Павлодар облысында мемлекеттік тіл саясатын одан әрі жетілдіру жөніндегі жұмыс тобының отырысы өтті

2017 жылғы 26 қыркүйекте облыс әкімдігінде Павлодар облысында мемлекеттік тіл саясатын одан әрі жетілдіру жөніндегі жұмыс тобының кезекті отырысы өтті.

Күн тәртібінде қазақ тілінің әліпбиін латын графикасына кезең-кезеңімен көшу және Екібастұз қаласы мен облыс кәсіпкерлік, сауда және туризм басқармасындағы ҚР «Қазақстан Республикасындағы тіл туралы» Заңын іске асыру және іс қағаздарын мемлекеттік тілде жүргізу мәселелері қаралды.

Жұмыс тобының отырысында қала, аудан әкімдеріне және мемлекеттік орган басшыларына қазақ тілінің әліпбиін латын графикасына кезең-кезеңімен көшу және Қазақстан Республикасындағы тіл туралы Заңнамасын сақтау бойынша қажетті тапсырмалар берілді.

 

 

Облыс тілдерді дамыту жөніндегі басқармасы